Intenziun

Nus carstgauns essan vairamain olmas fidaivlas. Ed envers nagut n'essan nus uschè fidaivels sco envers nossas disas. I dovra buns motivs per midar ellas. Ma mintgatant vali la paina. Uschiglio cuntinuain nus noss viadi tras la vita sulettamain sin „autostradas“ che nus enconuschain ordador e che daventan cun il temp lungurusas e monotonas. Ed insacura as dumandain nus forsa: È quai stà tut?

Sche nus essan cunzunt fidaivels a nossas disas e betg a noss talents, noss siemis e nossas ideas, lura na vegnin nus mai a savair ch’i dat sper las autostradas anc millis vias, sendas, trutgs e percurs che mussan a nus

• quant ritga ed interessanta che la topografia da la vita è
• quantas experientschas captivantas che nus savessan anc far
• quants pensums ch’ans spetgan anc.

Mintgatant dovri impuls d’ordaifer per daventar avert era per autras vias, per guardar cun auters egls, per sentir cun auters senns, per gughegiar da far e patratgar auter.

E mintgatant fai bain da pudair tancar tar insatgi auter ideas, forza e plaschair per cuntinuar cun nova motivaziun la via da la vita, ina via en furma da spirala.

Mia impulseria è ina spezia da tancadi.