Lavur dad autobiografia
I dat blers models e numerusas pussaivladads da s'occupar da l'atgna vita. Ils differents curs e seminaris che vegnan offerts ozendi en quest sectur, reflecteschan il giavisch da sa far patratgs sur da l'atgna existenza.
La lavur dad autobiografia tenor in concept logoterapeutic da Elisabeth Lukas (* 1942), è in eveniment particular. L'entira lavur è structurada en nov chapitels. Ma i na sa tracta betg dad ina analisa e n'er betg d'ina terapia. I na va betg per fufragnar senza fin en il passà. E la finamira primara n'è er betg da crear in product litterar. I va per emprender d’enconuscher e d’acceptar l’atgna via da la vita, ina via ch’è tar mintga carstgaun unica. Ed i va per tadlar co auters èn sin lur via da la vita. Bler è dà en nossa vita e na sa lascha betg midar. Ma i dat era bler che nus savain e pudain sez decider ed influenzar.
Jau accumpogn adina puspè pitschnas gruppas da trais persunas sin lur "viadi" tras questa lavur. L'entir program cuzza circa diesch mais. L'emprima sentupada è in inscunter d'infurmaziun. Silsuenter s'entaupan las trais persunas ina giada al mais per in stgomi. La gronda part da la lavur fa dentant mintga persuna per ella a chasa, cun reflectar e cun scriver. Abstrahà da questa structura clera datti però gronda libertad persunala co dar furma e cuntegn a questa lavur. Bain inqual persuna che jau hai dastgà accumpagnar en questa lavur, ha enritgì ses scriver cun skizzas, dissegns, purtrets er fotografias.
Per la lavur dad autobiografia n'hai jau betg termins fixs. As annunziai tar mai, sche Vus manegias che quai pudess esser era per Vus in'experientscha captivanta. Jau as prend lura gugent sin mia glista da persunas interessadas. Mintgatant vai spert enfin ch'ina gruppa da trais è ensemen, mintgatant dovri in pau dapli temps. E mintgatant s'annunzian gist trais persunas che s'enconuschan e che vulan far ensemen questa lavur.
Ils termins vegnan fixads da cuminanza a chaschun da l'emprima sesida.
Il lieu: mia stanza da lavur a Ruschein
Il pretsch: CHF 1300.- per persuna
Ma contactai sche Vus vulais savair dapli.