Logoterapia
La logoterapia è in concept intelligent e captivant per dar furma ed expressiun a l’atgna vita e quai en il rom da libertad e responsabladad, sinaquai che la vita gartegia, sch'i sto ad esser era sut circumstanzas e cundiziuns difficultusas.
La logoterapia, betg da scumbigliar cun la logopedia, è vegnida sviluppada da Viktor E. Frankl (1905-1997), in psichiater e psicoterapeut da Vienna. Sia constataziun fundamentala: "Il carstgaun è ina creatira che s’orientescha tenor quai che fa senn. Sche l’uman fa l’experientscha ch’insatge haja senn, lura resenta el quai sco insatge che ha valur." Sa confruntar cun valurs, era cun las atgnas, è impurtant ed interessant.
Ed en connex cun il senn datti bleras definiziuns, p.ex.: "Senn è la pussaivladad la pli preziusa ch'i vala da realisar en ina situaziun concreta." Mintgatant vul quai dir far insatge, mintgatant laschar da far e tegnair ora. Era giudair insatge cun plaschair fa senn e qua e là fai schizunt senn da midar l'atgna opiniun u tenuta.
Sco cussegliadra da logoterapia accumpogn jau carstgauns sin lur via dal svilup persunal:
- en situaziuns nua ch’i va per prender decisiuns impurtantas
- en crisas da la vita
- en temps d’ina nova orientaziun ubain
- simplamain sch’insatgi ha il giavisch da purtar dapli colur e dapli senn en sia vita
La finamira:
Chattar las atgnas valurs e resursas per continuar la via mintga di danovamain.
Mia scolaziun:
Da 2006 enfin 2010 hai jau fatg il NDS HF (Nachdiplomstudium Höhere Fachschule) en logoterapia ed analisa d'existenza tenor Viktor E. Frankl a l'ILE (Institut für Logotherapie und Existenzanalyse) a Cuira e terminà questa scolaziun cun il diplom federal sco cussegliadra da logoterapia.